നിർമാണ മേഖലയിലെ പ്രവർത്തനച്ചെലവ് കുത്തനെ ഉയർന്നതിനെ തുടർന്ന് മണ്ണുമാന്തി യന്ത്രങ്ങളുടെ വാടക നിരക്കിൽ വർധനവിന് തീരുമാനമായി. കൺസ്ട്രക്ഷൻ എക്വിപ്മെന്റ്സ് ഓണേഴ്സ് അസോസിയേഷൻ നടത്തിയ വാർത്താസമ്മേളനത്തിലാണ് തീരുമാനം പ്രഖ്യാപിച്ചത്.
ഒക്ടോബർ ഒന്ന് മുതൽ എക്സ്കവേറ്റർ, ബാക്ക്ഹോ ലോഡർ, ക്രെയിൻ, ടിപ്പർ എന്നിവയ്ക്കു 10 മുതൽ 20 ശതമാനം വരെ നിരക്കുയരും. ബാക്ക്ഹോ ലോഡറുകളുടെ വാടക 1400 രൂപയിൽ നിന്ന് 1600 രൂപയായി ഉയരും. മിനി എക്സ്കവേറ്ററുകളുടെ വാടക 1200 രൂപയിൽ നിന്ന് 1400 രൂപയാകും. മറ്റെല്ലാ മെഷിനറികൾക്കും 10-20 ശതമാനം വരെ വർധനവ് ഉണ്ടായിരിക്കും.
വിലവർധനയ്ക്ക് പിന്നിലെ കാരണങ്ങൾ:
30 വർഷമായി പഴയ നിരക്കിൽ പ്രവർത്തിച്ചിരുന്ന മേഖലയ്ക്ക് വില വർധന അനിവാര്യമാണെന്ന് ഭാരവാഹികൾ പറഞ്ഞു. വാഹനങ്ങൾ, മെഷിനറി, സ്പെയർ പാർട്സ്, ടയറുകൾ, ഇന്ധനം എന്നിവയുടെ വില പത്തു മടങ്ങ് ഉയർന്നിട്ടുണ്ട്. തൊഴിലാളികളുടെ വേതനവും നിർമാണ മേഖലയിലെ അസംസ്കൃത വസ്തുക്കളുടെ വിലയും വൻതോതിൽ വർധിച്ചു. വിവിധ സർക്കാർ വകുപ്പുകളുടെ നിയന്ത്രണങ്ങളും ഇടയ്ക്കിടെയുള്ള പിഴ ചുമത്തലുകളും സമയ നിയന്ത്രണങ്ങളും മേഖലയുടെ നിലനിൽപ്പിനെ ബാധിച്ചിട്ടുണ്ട്.
വാടക വർധനയുടെ ലക്ഷ്യം:
സംസ്ഥാനമെങ്ങും ജില്ലാ അടിസ്ഥാനത്തിൽ വാടക ക്രമീകരിച്ച്, മറ്റു മേഖലകളെ പ്രതികൂലമായി ബാധിക്കാത്ത രീതിയിൽ നീക്കം നടപ്പിലാക്കാനാണ് തീരുമാനിച്ചിട്ടുള്ളത്.
