മോസ്കോയിൽ നടന്ന റഷ്യയും യുഎസും തമ്മിലുള്ള യുക്രെയ്ൻ സമാധാന ചർച്ചകൾ വീണ്ടും പരാജയപ്പെട്ടതായി റിപ്പോർട്ടുകൾ. റഷ്യൻ പ്രസിഡന്റ് വ്ലാഡിമിർ പുടിനും യുഎസിന്റെ പ്രത്യേക പ്രതിനിധി സംഘവുമായ സ്റ്റീവ് വിറ്റ്കോഫ്, ജാരെഡ് കുഷ്നർ എന്നിവർ തമ്മിൽ അഞ്ച് മണിക്കൂറോളം നീണ്ട ചർച്ചകൾ നടത്തി. ചർച്ചകൾ ‘ഫലപ്രദമായിരുന്നു’െന്ന് റഷ്യ വ്യക്തമാക്കി. എന്നാൽ ഒരു നിർണ്ണായക തീരുമാനത്തെയും സംബന്ധിച്ച് ഇരു പക്ഷങ്ങളും ധാരണയിൽ എത്താനായില്ല.
ചർച്ചയിലെ പ്രധാന തടസ്സമായി തന്നെയാണ് റഷ്യ യുക്രെയ്ൻ ഭൂമികൈമാറ്റ വിഷയത്തിൽ നിലപാട് കടുപ്പിച്ചതെന്ന് സൂചന. ലുഹാൻസ്ക്, ഡൊണെറ്റ്സ്ക്, ഖേഴ്സൺ, സപോറേഷ്യ എന്നിവിടങ്ങളിൽ നിന്ന് യുക്രെയ്ൻ സൈന്യം പൂർണ്ണമായി പിന്മാറണമെന്നതാണ് പുടിൻ ആവർത്തിച്ച് മുന്നോട്ടുവച്ച ആവശ്യം. ഈ പ്രദേശങ്ങൾ ഔദ്യോഗികമായി റഷ്യയ്ക്ക് വിട്ടുനൽകിയാൽ മാത്രമേ യഥാർത്ഥ സമാധാന കരാറിൽ ഒപ്പുവയ്ക്കാനാകൂ എന്ന നിലപാട് തുടർന്നും റഷ്യ സ്വീകരിച്ചിരിക്കുകയാണ്.
യുഎസ് നിർദേശങ്ങളിൽ ചിലതിനെ റഷ്യ സ്വീകാര്യമായി കണ്ടെങ്കിലും നിർണായക വിഷയങ്ങളിൽ വിട്ടുവീഴ്ചക്ക് തയ്യാറല്ല എന്നതാണ് ചർച്ച പരാജയപ്പെടാൻ കാരണമായത്. യുക്രെയ്ൻ യുദ്ധം അവസാനിപ്പിക്കുന്നതിനായുള്ള വാഷിങ്ടൺ നിർദേശിച്ച സമാധാന കരാറിനും പുടിൻ നേരത്തേതന്നെ തണുത്ത നിലപാടായിരുന്നു കാട്ടിയത്. യുക്രെയ്ൻ ഭൂമി വിട്ടുകൊടുക്കുന്ന വിഷയത്തിൽ യാതൊരു ആലോചനക്കും റഷ്യ തയാറല്ലെന്ന് ചർച്ചയ്ക്കു ശേഷം റഷ്യൻ വക്താവ് വ്യക്തമാക്കി.
പുടിൻ–ട്രംപ് കൂടിക്കാഴ്ച ഉടൻ ഉണ്ടാകില്ലെന്നും റഷ്യ അറിയിച്ചു. യുഎസ്–റഷ്യ ബന്ധത്തിൽ പുതുവായുള്ള സമാധാന ശ്രമങ്ങൾക്ക് ഇനി കൂടുതൽ തലത്തിലുള്ള ചർച്ചകൾ ആവശ്യമാണെന്ന് റഷ്യയും യുഎസും സൂചിപ്പിക്കുന്നു.
യുദ്ധം തുടരുന്ന സാഹചര്യത്തിൽ ഈ ചർച്ചകളുടെ പരാജയം അന്താരാഷ്ട്രതലത്തിൽ ആശങ്ക ഉയർത്തുന്നുണ്ട്. പ്രത്യേകിച്ച്, യുക്രെയ്നിലെ കിഴക്കൻ മേഖലകളിൽ തുടർച്ചയായ ആക്രമണങ്ങൾ തുടരുമ്പോൾ സമാധാന ശ്രമങ്ങൾക്ക് തടസ്സം നേരിടുന്നത് യുദ്ധം കൂടുതൽ ദൈർഘ്യമാകാൻ ഇടയാക്കുമെന്ന് വിദഗ്ധർ മുന്നറിയിപ്പ് നൽകുന്നു.
