പാലക്കാട്: നഗരസഭയിൽ ബിജെപി അധികാരത്തിലെത്തുന്നത് തടയാൻ എൽഡിഎഫും യുഡിഎഫും കൈകോർക്കുമോ എന്ന നിർണായക ചോദ്യമാണ് ഇപ്പോൾ പ്രധാന രാഷ്ട്രീയ ചർച്ച. ബിജെപിയെ മാറ്റിനിർത്താൻ സഹായകരമായ നിലപാട് സ്വീകരിക്കാമെന്ന സൂചന നൽകി കോൺഗ്രസ് പ്രാദേശിക നേതൃത്വം ചർച്ചകൾക്കുള്ള സാധ്യത തുറന്നുവെച്ചിട്ടുണ്ട്. എന്നാൽ സംസ്ഥാന നേതൃത്വവുമായി വിശദമായ ആലോചന നടത്തിയ ശേഷം മാത്രമേ നിലപാട് പ്രഖ്യാപിക്കൂവെന്നതാണ് സിപിഐഎമ്മിന്റെ തീരുമാനം.
പാലക്കാട് നഗരസഭയിലെ കക്ഷിനില ഇങ്ങനെ: ബിജെപി – 25,
യുഡിഎഫ് – 18,
എൽഡിഎഫ് – 9,
സ്വതന്ത്രൻ – 1.
ആർക്കും ഒറ്റയ്ക്ക് ഭൂരിപക്ഷം ഇല്ലാത്ത സാഹചര്യത്തിൽ ആരാകും നഗരസഭ അധ്യക്ഷൻ എന്നതാണ് നിർണായക ചോദ്യം. ബിജെപി അധികാരത്തിലെത്തുന്നത് തടയാൻ സ്വതന്ത്രനെ പിന്തുണയ്ക്കുന്ന നിലപാട് കോൺഗ്രസ് ഇതിനകം സ്വീകരിച്ചിട്ടുണ്ട്. ഇതോടെ ഇരുമുന്നണികൾക്കും എതിരായി ബിജെപി ശക്തമായ വിമർശനവുമായി രംഗത്തെത്തിയിട്ടുണ്ട്.
ബിജെപിയെ മാറ്റിനിർത്തുക എന്നതാണ് കോൺഗ്രസിന്റെ ലക്ഷ്യമെന്ന് ഡിസിസി പ്രസിഡന്റ് എ. തങ്കപ്പൻ വ്യക്തമാക്കി. അത് സാധ്യമാകുന്നത് ജനാധിപത്യപരമായ നല്ല മാർഗത്തിലൂടെയാണെങ്കിൽ അത്തരം നീക്കങ്ങൾ പരിഗണിക്കുമെന്നും അദ്ദേഹം പറഞ്ഞു. ഡിസിസി പ്രസിഡന്റിന്റെ നിലപാട് ജനറൽ സെക്രട്ടറി കെ.സി. വേണുഗോപാലും ആവർത്തിച്ചതോടെ കോൺഗ്രസിന്റെ സമീപനം വ്യക്തമായി.
അതേസമയം, ഇത്തരം രാഷ്ട്രീയ തീരുമാനങ്ങൾ വ്യക്തിപരമായ അഭിപ്രായങ്ങളുടെ അടിസ്ഥാനത്തിൽ ഉണ്ടാകേണ്ടതല്ലെന്ന് സിപിഐഎം ജില്ലാ സെക്രട്ടറി ഇ.എൻ. സുരേഷ് ബാബു പ്രതികരിച്ചു. പാർട്ടിയുടെ സംഘടനാ സംവിധാനത്തിലൂടെ ചർച്ച ചെയ്ത് തീരുമാനമെടുക്കുമെന്നും, കെ.സി. വേണുഗോപാലോ രമേശ് ചെന്നിത്തലയോ പറഞ്ഞ കാര്യങ്ങൾ സിപിഐഎമ്മിന്റെ നിലപാടിനെ ബാധിക്കില്ലെന്നും അദ്ദേഹം പറഞ്ഞു. ഉചിതമായ സമയത്ത് ഉചിതമായ തീരുമാനം ഉണ്ടാകുമെന്നും സുരേഷ് ബാബു കൂട്ടിച്ചേർത്തു.
നിയമസഭാ തിരഞ്ഞെടുപ്പ് അടുത്തിരിക്കെ സഖ്യചർച്ചകളെ രാഷ്ട്രീയ പ്രചാരണായുധമാക്കുകയാണ് ബിജെപിയെന്ന് പാർട്ടി നേതാവ് ഇ. കൃഷ്ണദാസ് ആരോപിച്ചു. പാലക്കാട് ഉണ്ടാകുന്നത് മതേതര സഖ്യമല്ല, “മാങ്കൂട്ടത്തിൽ സഖ്യമാണ്” എന്നും അദ്ദേഹം വിമർശിച്ചു.
