ന്യൂഡൽഹി: ദൃശ്യ, ഡിജിറ്റൽ വാർത്താ മാധ്യമങ്ങളിൽ വിദ്വേഷ പരാമർശങ്ങൾ വലിയ തോതിൽ വർധിച്ചതായി കണക്കുകൾ. ടെലിവിഷൻ ചാനലുകൾക്കും ഡിജിറ്റൽ വാർത്താമാധ്യമങ്ങൾക്കും ഉള്ള സ്വയംനിയന്ത്രണ സമിതിയായ ന്യൂസ് ബ്രോഡ്കാസ്റ്റിംഗ് ആൻഡ് ഡിജിറ്റൽ സ്റ്റാൻഡേർഡ് അതോറിറ്റി (NBDSA) കഴിഞ്ഞ മൂന്ന് വർഷത്തിനിടെ പുറപ്പെടുവിച്ച ഉത്തരവുകളിൽ 60 ശതമാനവും മതസൗഹാർദം സംബന്ധിച്ച ചട്ടങ്ങൾ ലംഘിച്ച പരിപാടികൾക്കെതിരെയാണെന്ന് റിപ്പോർട്ട് വ്യക്തമാക്കുന്നു.
2023 ജനുവരി 1 മുതൽ 2025 ഡിസംബർ 31 വരെ അതോറിറ്റി പുറപ്പെടുവിച്ച 54 ഉത്തരവുകളിൽ 32 എണ്ണം മതസൗഹാർദ ചട്ടങ്ങൾ ലംഘിച്ചതായി കണ്ടെത്തി പിഴ ചുമത്തിയവയാണ്. ‘ലവ് ജിഹാദ്’, ‘തുപ്പൽ ജിഹാദ്’ തുടങ്ങിയ പരാമർശങ്ങൾ മുതൽ പ്രാദേശിക ന്യൂനപക്ഷ സമുദായങ്ങളെ ലക്ഷ്യമിട്ട ഉള്ളടക്കങ്ങളും ഇസ്രായേൽ–ഹമാസ് സംഘർഷം ഉപയോഗിച്ച സംഭവങ്ങളും അതോറിറ്റിക്ക് മുന്നിലെത്തിയിട്ടുണ്ട്.
ഭൂമി കൈയേറ്റം, സ്ത്രീസുരക്ഷ, ഭക്ഷ്യശുചിത്വം തുടങ്ങിയ വിഷയങ്ങൾ പരാമർശിക്കുമ്പോൾ പോലും ‘ജിഹാദ്’ എന്ന പദം അനാവശ്യമായി ഉപയോഗിച്ചതായും റിപ്പോർട്ട് ചൂണ്ടിക്കാട്ടുന്നു.
വിദ്വേഷം അടക്കം വിലക്കുള്ള ഉള്ളടക്കങ്ങൾ ഭാഗികമായോ പൂർണമായോ നീക്കം ചെയ്യാനും പരമാവധി 25 ലക്ഷം രൂപ വരെ പിഴ ചുമത്താനും അതോറിറ്റിക്ക് അധികാരമുണ്ട്. എന്നാൽ, അന്തിമ ഉത്തരവ് നൽകാൻ ശരാശരി 12 മാസം വരെ എടുക്കുന്നതിനാൽ, പരാതിക്കാധാരമായ ഉള്ളടക്കം അതേപടി ഡിജിറ്റൽ പ്ലാറ്റ്ഫോമുകളിൽ തുടരുന്ന സാഹചര്യം നിലനിൽക്കുന്നതായും റിപ്പോർട്ട് പറയുന്നു.
ഇതുവരെ ചുമത്തിയ ഏറ്റവും ഉയർന്ന പിഴ ഒരു ലക്ഷം രൂപയാണ്. മിശ്രവിവാഹത്തെക്കുറിച്ചുള്ള ഒരു റിപ്പോർട്ടിൽ യാഥാർത്ഥ്യം പരിശോധിക്കാതെയാണ് ‘ലവ് ജിഹാദ്’ എന്ന പദം ഉപയോഗിച്ചതെന്ന കണ്ടെത്തലിനെ തുടർന്ന് ടൈംസ് നൗ നവഭാരത് ചാനലിനാണ് ഈ പിഴ ചുമത്തിയത്.
ജനസംഖ്യാ വർധനവുമായി ബന്ധപ്പെട്ട കണക്കുകൾ വിശ്വസനീയമായ തെളിവുകളില്ലാതെ ഏതെങ്കിലും സമുദായത്തെ കുറ്റപ്പെടുത്താൻ ഉപയോഗിക്കുന്നത് ഉചിതമല്ലെന്ന് അതോറിറ്റി വ്യക്തമാക്കി. സുപ്രീംകോടതി മുൻ ജഡ്ജി ജസ്റ്റിസ് എ.കെ. സിക്രിയുടെ അധ്യക്ഷതയിലുള്ള എട്ട് അംഗ സമിതിയാണ് NBDSA.
