മലപ്പുറം: ജൂൺ 18: കേരള ഗ്രാമീണ ബാങ്ക് സ്ഥാപന ചരിത്രത്തിലെ ഏറ്റവും ഉയർന്ന ലാഭം കൈവരിച്ച് ശ്രദ്ധേയമായ നേട്ടം സ്വന്തമാക്കിയതായി ബാങ്ക് ചെയർപേഴ്സൺ അറിയിച്ചു. മലപ്പുറം പ്രസ് ക്ലബ്ബിൽ നടന്ന വാർത്താസമ്മേളനത്തിൽ 2025-26 സാമ്പത്തിക വർഷത്തെ പ്രവർത്തനഫലങ്ങൾ അവതരിപ്പിക്കവെയാണ് അവർ ഇക്കാര്യം വ്യക്തമാക്കിയത്.
2026 മാർച്ച് 31-ന് അവസാനിച്ച സാമ്പത്തിക വർഷത്തിൽ ബാങ്കിന്റെ ആകെ ബിസിനസ് ₹65,835 കോടിയായി ഉയർന്നു. മുൻവർഷത്തെ അപേക്ഷിച്ച് 19.72 ശതമാനം വളർച്ചയാണ് ബാങ്ക് കൈവരിച്ചത്. നിക്ഷേപം ₹32,489 കോടിയും വായ്പകൾ ₹33,346 കോടിയുമായി ഉയർന്നു. യഥാക്രമം 18.46 ശതമാനവും 20.98 ശതമാനവും വളർച്ച രേഖപ്പെടുത്തി.
ബാങ്കിന്റെ അറ്റാദായം (Net Profit) ₹776 കോടിയായി ഉയർന്ന് ചരിത്രത്തിലെ ഏറ്റവും ഉയർന്ന ലാഭം കൈവരിച്ചു. മുൻവർഷത്തേക്കാൾ 148.08 ശതമാനം വളർച്ചയാണ് അറ്റാദായത്തിൽ രേഖപ്പെടുത്തിയത്. പ്രവർത്തന ലാഭം (Operating Profit) ₹940 കോടിയായി ഉയർന്ന് 119.33 ശതമാനം വളർച്ച കൈവരിച്ചു.
ആസ്തി ഗുണനിലവാരത്തിലും ബാങ്ക് മികച്ച പ്രകടനം തുടർന്നു. നെറ്റ് എൻ.പി.എ പൂജ്യമായി (0%) നിലനിർത്താൻ ബാങ്കിന് സാധിച്ചു. ഗ്രോസ് എൻ.പി.എ 1.43 ശതമാനമായി കുറയുകയും 100 ശതമാനം പ്രൊവിഷൻ കവറേജ് റേഷ്യോ നിലനിർത്തുകയും ചെയ്തു.
കാർഷിക മേഖലയ്ക്കും ഗ്രാമീണ സമ്പദ്വ്യവസ്ഥയ്ക്കും ശക്തമായ പിന്തുണ നൽകുന്ന ബാങ്കായി കേരള ഗ്രാമീണ ബാങ്ക് തുടരുകയാണെന്ന് ചെയർപേഴ്സൺ പറഞ്ഞു. ബാങ്കിന്റെ മുൻഗണനാ മേഖലാ വായ്പ വിതരണം 94.10 ശതമാനവും, കാർഷിക വായ്പ വിതരണം 58.10 ശതമാനവും ആയി ഉയർന്ന് നിർദ്ദിഷ്ട മാനദണ്ഡങ്ങളെ മറികടന്നിട്ടുണ്ട്.
സംസ്ഥാനമൊട്ടാകെ വ്യാപിച്ചുകിടക്കുന്ന 635 ശാഖകളും 269 എ.ടി.എമ്മുകളും വഴി ബാങ്ക് ഉപഭോക്താക്കൾക്ക് സേവനം നൽകുന്നുണ്ട്. ഉപഭോക്താക്കളുടെ വിശ്വാസം, ജീവനക്കാരുടെ അർപ്പണബോധം, കേന്ദ്ര-സംസ്ഥാന സർക്കാരുകൾ, നബാർഡ്, സ്പോൺസർ ബാങ്കായ കാനറ ബാങ്ക് എന്നിവരുടെ പിന്തുണ എന്നിവയാണ് ഈ നേട്ടങ്ങൾക്ക് പിന്നിലെന്ന് ചെയർപേഴ്സൺ പറഞ്ഞു.
വാർത്താസമ്മേളനത്തിൽ ബാങ്ക് ചെയർപേഴ്സൺ വിമല വിജയ ഭാസ്കർ, ജനറൽ മാനേജർമാരായ ഹർക്കേശ്വർ പ്രസാദ്, ഹരീഷ് ഗുണ്ടേക്കർ, ചീഫ് മാനേജർമാരായ രാജീവ് ആർ, ജിതിൻ വി എന്നിവർ പങ്കെടുത്തു. ഡിജിറ്റൽ ബാങ്കിംഗ്, സാമ്പത്തിക ഉൾക്കൊള്ളൽ, ഉപഭോക്തൃ കേന്ദ്രീകൃത സേവനങ്ങൾ, സുസ്ഥിര വളർച്ച എന്നിവ ലക്ഷ്യമാക്കി ബാങ്ക് മുന്നോട്ടുപോകുമെന്നും ചെയർപേഴ്സൺ അറിയിച്ചു.
